1/08/1924 - 13/02/2020
  • Biografía
  • Audios
  • Videos (1)

Margarita tiña doce anos cando o golpe de Estado cambiou para sempre a súa vida. O seu pai, Mauro Caballero, era socialista e tivo que pasar dous anos agochado nun oco habilitado na cociña para evitar a barbarie que se cometera xa con tantas amizades. Como Elvira Lodeiro, que foi fusilada o 19 de decembro de 1936, apenas un día despois de que os fascistas lle plantaran lume ao alboio onde se agochaba o seu home, Juan Manuel Gómez Corbacho. Deixaron dúas orfas e a máis pequena, Manolita, que só tiña tres anos, foi criada por Mauro e a súa muller, Petra Calleja. Desde aquel día, Manolita foi para Margarita a irmá que nunca tivera e xuntas loitaron contra a desmemoria que durante o franquismo e ata na democracia quería deixar atrás a dor sufrida por ambas familias.

Ademais do agocho de Mauro, o golpe provocou que os seus fillos Mauro e Federico foran detidos e este último salvouse das sacas no frontón de Vigo grazas a ter nacido en Cuba e contar con protección diplomática. Mentres, o seu fillo Carlos fuxía do país para non acabar na cadea e Pepe era alistado no bando contrario ás ideas da súa familia.

Todo cambiou naquel verán, tamén para Margarita. Tardou dous anos en volver pisar unha aula, o mesmo tempo que tardou seu pai en saír do agocho, e aquela escola franquista á que regresou en nada se asemellaba a aquela de Hernán Poza onde ela estudaba antes de que as arelas da República fosen tamén asasinadas.

Autora: Montse Fajardo

Esta é unha biografía resumida, a completa pódese encontrar no PDF descargable.

Biografías Relacionadas
Share on facebook
Share on twitter
Share on linkedin
Share on whatsapp
Share on telegram
Share on email